منطق الأقلية . . وأزمة التخلف الديني

تتمة لحديث سابق (الأزمة اللبنانية وفتيل الحرب المشتعل)

شام : انا حاسس في كتير شيعة بلبنان مخطوفين يعني نفسن مع 14 آذار بس مو مسترجين، متل ماصار مع السيد علي الأمين امبارح احتلوا مكتبه حركة امل و رفعوا علمن.

سياب: ممكن جدا، مو معقول بداهةً كل الشيعة مع حزب الله والمعارضين خايفين تطلعلهم شي فتوة تطيرهم ويتحاربو من ضمن الطائفة لهيك ما بيحسنو يعبروا عن موقفهم. وانت شفت انه السيد علي الأمين دفع ثمن موقفه السياسي وطيروه من منصبه كمفتي.

انا التقيت منهم ناس هون يقولون نحن مع السيد والمقاومة وكلنا فداه بس تعبنا من الحرب والتهجير بدنا نعيش متلنا متل غيرنا.

شام: اي بس انا ملاحظ الشيعة عم يتصرفوا بانعزالية

سياب: كيف

شام: رح وضحلك لاحظ معي هلئ الشيعة بالجتمع كيف؟ يعني نحن بالشام مثلا الشيعي ما بيشغل غير شيعي و ما بيشتري غير من عند شيعي و اكتر تعاملاته المالية مع شيعة كمان و حتى سكنن، يعني عم بتحس دغري انو في جدار بينك و بينو.

بتعرفو لـ****

سياب: اي

شام: هاد ما بيشغل عندو الا شيعة او متشيعين . . انا عم قلك بعرف كتير ناس تشيعوا بس مشان يحققوا المكاسب المالية و هنن يمكن ما بيعرفوا الله او حتى جواتن سنة

سياب: هذا سلوك وتصرف الأقليات دائما، يحبو ينفعوا بعض وقلبهم على بعض لأنه الإنسان دائما يعتمد بعلاقاته ع الروابط المشتركة واشتراك فئة ما بصفة معينة يعطيهم من خلال تعاملهم مع بعض نوع من الأمان اللاشعوري ودوافع أخرى

شام: اي منطق الاقلية

سياب: السنة ولو اني ما كتير بحب تداول هالتسميات ما بيتصرفو هيك

شام: بس هاد المنطق وقت بكون في دولة راعيتن عم يتحول تدريجياً لولاء

سياب: لأنهم مانهم أقلية لهيك ما عندهم هالمنطق رغم انه في هيك ناس متعصبين. ولو كانوا السنة أقلية كان عملوا نفس الشي، لاحظ انت الأكراد بيحاولوا ما بيتعاملوا غير مع الأكراد والأرمن نفس الشي وأي أقلية تحت أي تصنيف بأي مجتمع تلاقي انهم ميالين للتعامل مع بعض أكتر، هالشي حالة عامة مانها حكر على حدا معين.

شام: اي مضبوط

سياب: بس التصرف بعدائية اتجاه هالشي يزيد الأمر تعقيد ما بيحلو

شام: قبل احتلال العراق يمكن ماكنت بعرف الشيعة غير انو ناس متل الأحناف أو الشافعية او هيك . . يعني مجرد تسمية تدل على مذهب فقهي

سياب: يعني العاقلين موجودين بكل مكان والتشدد يدفع الجميع نحو التحزب.

شام: اديش نسبة العاقلين من الطرفين ؟ 1 بالألف

سياب: كتير اخي بس المشكلة الآن في شحن لهيك العقل غايب وعم يغلب السلوك القطيعي وسلوك حماية الذات من الآخر

شام: انا معك العقل غايب عنا من زمان و لازال بمراحله الغرائزية القبلية بس يعني حاسس لبين ما يصير في وعي رح تصير مجازر بين السنة و الشيعة و خاصة بالمناطق اللي عنا

سياب: لا . . بسوريا قصدك ؟

شام: يعني ايران و العراق و الخليج و الشام

سياب: لا سوريا ما بظن مع انه ممكن يصير توتر محدود جدا ولا يعتبر

شام: امممممم سوريا اسوأ مثال للتعايش التعايش بدافع الخوف من الجميع يعني السني بيتعايش مع السني حتى بدافع الخوف و الله مجتمعنا مفكك تماما و الله يستر

سياب: لا مو مفكك وسوريا على العكس تماما من اللي تحكيه هي حقيقة أفضل مثال عن العيش( وليس التعايش ) المشترك بين مختلف الناس هاي شغلة الواقع يحكي عنها ومانها خاضعة لرأيي ورأيك.

بعدين الإقتتال بين مين ومين رح يصير دخلك!

شام: السنة مع اللا سنة

سياب: لا لا ما تصور الأمر هيك وحاج تقلي سنة ولا سنة ولو جيت وفق ما تقول نسبة الشيعة بسوريا قليل كتير والعلويين ما عندهم هالإشكال وقصة المذهب مانها هاجس بالنسبة الهم وما في هالإحتقان بيناتهم وكذلك بقية الفئات.

الشيعة بكل فئاتهم من طول عمرهم موجودين، وسوريين وعرب ما في فرق وما في احتقان. وان كان في شيء نوع من الاختلاف بين الجميع فهو نفس نوع الاختلاف اللي يخلي الحلبي يعز الحلبي اكتر من الشامي او الحمصي يعني تجمعات طبيعية مبنية على تقسيمات مختلفة تظهر وفقا للحالة التي تخليها تظهر.

عم تلاحظ انت كطالب جامعي مثلا بالجامعة تلاقي كل اهل محافظة او مدينة يلتموا على بعض بشكل طبيعي وقس هالشي على بقية التصنيفات. وبالعودة لنفس النقطة اللي حكينا فيها هالأشيا اللي عم تشوفها موجودة بكل مكان بحكم منطق الأقلية مو اكتر وحالة التخلف اللي نعاني منها. ما عم قلك انه الوضع بالمنطقة ما بيأثر، اكيد لكن الناس بتضلا اوعى عنا

شام: اممممممممم كلامك يستحق الصفن بس متأكد من شغلة الوعي عنا؟

سياب: الناس المو وعيانة وعيت بعد العراق واللي صار فيه، بعدين شريك كثرة تداول ” سنة شيعة ” تعمل بلبلة غير موجودة لهيك ما كتير تركز على هالأمر، ما بقلك تتعامى عن الواقع والوقائع لكن

شام: كيف مو موجودة شفتها بالعراق بشكل مرعب للغاية

سياب: موجودة ما بنكر

شام: و هلئ لبنان يعني المي ماشية

سياب: بس كثرة الحديث عنها بمنطق نحن وهم يعمل فرز على الأقل ع المستوى النفسي. انت نموذج رح توقف تلقائيا مع السنة بدون النظر الحق مع مين

شام: انا عم شخص الواقع بموضوعية شديدة

سياب: لا لإنك عم تشحن نفسك بقصة سنة شيعة، ما بنكر الواقع السيء لكن نحن المفروض نتخلص من هالعقلية

شام: يا عبد انا بصراحة كنت مهتم بالإسلام السياسي لفترة من الفترات، بس وقت شفت نتيجتو المرعبة بالعراق ارتديت عنو تماماً، يعني كنت مفكرو الخلاص

سياب: الإسلام السياسي لم ينتج سوى المجموعات المتشددة

شام: لكن شفت الاحزاب الشيعية و ايران نموذج اسلام سني بوجهه الشيعي.

سياب: واللي بصراحة انا بشوفها ارهابية لأنه الكل بيكون مستند على منطق القداسة وامتلاك الحق والحقيقية

شام: لا ناس معتدلين كان قصدي متل حماس سابقاً و اردوغان

سياب: انا الي رأي

شام: اي

سياب: الدين لا يمكن له ان يكون حزب سياسي، ممكن يكون ملهم وقواعد عامة تحكم السلوك

شام: مرجيعة

سياب: تمام دستور فقط

شام: بس انا هلئ خلص بدي ابصم بالعلمانية 10بـالعشرة لأني شفت التنيجة الفظيعة للدين بالسياسة

سياب: تمام انا معك قلتلك الإسلام مرجعية فقط حرام يدخل بمنازعات وتفاصيل، ولكن ليس وفقا للمفهوم العلماني الدارج. بعدين الدولة الراشدية كانت هيك، الإسلام مرجعها والتفاصيل كانت كلها اجتهادات ما حدا قال انه هذا كلام رباني متل ما عم يعملو اسلاميي اليوم

شام: بس بصراحة انا حاسس انو مشكلتنا ابعد من المذهبية,بصراحة في خلل بالقراءة الحالية للنصوص خاصة الشيعي

سياب: صح، المشلكة متعلقة بمنهج التفكير من حيث القراءة وثقافة قبول الآخر والإنغلاق ع الذات من طرف تاني، لا السنة يقرأوا الشيعة ولا الشيعة يقرأوا السنة إلا بحدود البحث عن أشياء تدين الفريق الثاني، رغم ان الأزهر قام بخطوة ممتازة بتدريس المذهب الجعفري وهاي خطوة المفروض تتبعها خطوات مشتركة من الطرفين.

الفقه الشيعي فيه شغلات رائعة يا رجل خصوصا بقطاع المرأة

شام: مضبوط بس يعني ثارات الحسين و مدري مين و المواكب العزائية و هالجو الممقوت مو عبادة عم شوفها، حقد و بصراحة كل مرة بشوف الحقد فيها

سياب: هاي عبارة عن شاحن سنوي

شام: شحن ضد مين ؟

سياب: لحالة القطيعة والعداء للشيعة نفسهم

شام: السنة طبعاً فالأقربون أولى بالمعروف

سياب: يعني لما كل سنة عم يلطمو ع الحسين ويقولو السنة قتلوه مو شحن هاد

شام: خطاب تعبوي برفض و بغض الآخر لانه قتل أقدس و اطهر الناس

سياب: تماما على قصص انتهت وطواها الزمن واي موقف الآن لن يغير منها شي والمصيبة انه يتم تحميل فئة كاملة هي واحفاد احفادها الى يوم الدين مغبة عمل تفردت به السلطة الحاكمة انذاك

شام: شفت شلون الخلل فظيع و كبير وازمتهم مع القراءة الحالية لهالمذهب شبيهة بأزمتنا مع قراءة القاعدة للاسلام السني

سياب: يعني لو ايران عم تدفع هالفلوس مشان فتح مراكز حوار والسعودية نفس الشي كان من زمااان ازمة شيعي سني محلولة او ع القليلة خفت بس المصيبة الطرفين عم يشحنوا ضد بعض على الرغم من ان الازمة ازمة تاريخية انقضت وما يجمع هو الاكبر وهو الباقي والمستمر

شام: ايوا , الأزمة المعرفية وقودها النفط. لا تفكر انه صدفة تقاطع وجود الأصوليات مع منابع النفط. الأصولية وين ماكان بتقصي نفسها بنفسها بس مع وجود شريان مغذي متل النفط عم تقدر تحارب و تقاوم و تفتعل حرب بين الحين و الحين. و وجود اسرائيل اله اثر كبير

سياب: لك اخي عنجد انا بفكر احيانا انه يا اخي مشان الله شو الفرق بين شيعي سني؟! لك ما في فرق

شام: اي و الله

سياب: هو نفس الفرق بين حنفي حنبلي . . لك فروقات اجتهادية لا اكثر وانا كمسلم يحقلي اختار الإجتهاد المناسب والمقنع يعني سواء من الشافعي او الجعفري او غيرو دون الإضطرار للدخول تحت تسميات وتصنيفات لا تعنيني بشيء تصنيفات بحقيقتها تصنيفات سياسية في حقبة ما.

مثل معارضة وموالاة الآن في لبنان وتم صبغها بالدين كوسيلة لإضفاء طابع الأحقية والإستمرارية، ولاحقا تمت إضافة مسألة الخلافة والأأمة في صلب العقيدة لضمان استمرار ووجود الفريق الآخر مشان وكله لصالح الطبقة القيادية.

يا اخي انا الآن بعد مرور كل هالسنين شو الي علاقة بأزمة الخلافة، ومقتل الحسين وصراع الصحابة والجمل ومعاوية ويزيد؟ طيب اخي جيت معهم علي أحق بالخلافة (وفعلا هاد رأيي) طيب علي مات واللي اغتصبه حقو ماتو والشعب اللي كان رح يحكمو كله مات كمان

شام: انا معك

سياب: بس المصيبة

شام: و الحسين انظلم الله يرحمه

سياب: كتيييير المشكلة انه عم يصير شحن بأثر رجعي للمحافظة على الكينونة وايران عم تستخدم هالشي من اجل ايجاد قواعد شعبية الها

شام: حماية مصالحها و نفوذها

سياب: والتطرف الأصولي السني تطرف غبي جدا ممثلا بالسلفية السعودية وحركة الاخوان المسلمين في وقت مضى (رغم ادعائهم اليوم التغيير)

شام: والله التطرف السني مماثل للتطرف الشيعي بس الفرق بالأدوات صدقني

سياب: تماما شو عم قلك

شام: اي

سياب: التطرف قذر اين ما وجد وانا مسلم فقط .لا شيعي ولا سني وما بدي حدا يصنفني بس سعي الإنسان دائما

شام: طيب شوف بعينك مين برأيك راعي هالتطرفين و عالأغلب اله مصلحة بهيك صراع من هالطراز ؟

سياب: لإيجاد أطر اكتر ضيق لإضفاء نوع من الخصوصية . . .

شام: العالم كلو اندمج ببعضه ضمن القيم الانسانية و نحنا عم نحاول نضيق الدائرة على نفسنا اكتر اكتر

سياب: التخلف . . التخلف يا اخي بكل مطرح وبكل زاوية من زوايا الحياة تلاقيه . . ما في تطور بمكان وتخلف بمكان آخر لأنه التخلف روح والتطور روح . . ومستحيل تجتمع روحين بمكان واحد.

بس التخلف او التعصب الديني يكون واضح ومؤثر وخطير لما للدين من سطوة وتأثير على الناس

شام: طيب يا عبد انا شو مسؤوليتي تجاه طرف عم يحاول دفعي قسرياً لهيك صراع . . الانسان العادي مو انا قصدي. طرف عم يحشرك بالزاوية انت مالك غير رد فعل على هالشي هو اللي حشرك مو انت اللي اخترت.

سياب: ما فيني اعطيك جواب على هالسؤال لأنه بصراحة بحاجة لمراكز بحث وقرار

شام: التعصب الديني و التخلف شو سببو برأيك؟ مو الممارسات الديينية نفسها. يعني النص الشيعي بخلي الواحد يكره السني تلقائياً

سياب: لا التخلف والتعصب الديني وجه من اوجه التخلف بشكل عام . . نحن متخلفين عموما

شام: اي

سياب: والدين وجه من اوجه هالتخلف. الإشكالية الحقيقة جاية انه نحن ما عنا ثقافة الإنفتاح وعقلنا للآن ما اشتغل . . سيبك من التنظيرات والفهمانات الفردية اللي كل الناس يتمتعوا فيها ولكن المصيبة انه هالفهمانات ما عم تنسحب ع الممارسة وتبقى كلام في الهواء.

شام: بيوم من الايام عانى الغرب من نفس ازمتنا بعتقد

سياب: تماما وكب الدين وراه

شام: تمام

سياب: وصار يقبل الآخر كإنسان بغض النظر عن معتقده بس هون بحالتنا ما فينا نكب الدين لأنه مكون رئيسي النا

شام: بس لاحظ ما كب الدين بقدر ما حط حماية للدين و من الدين

سياب: مجبول فينا بس الأزمة انه الناس عم تتأثر بالتراث الديني وتحطه بمصاف النص القرآني اللي ما فيه كل هالخزعبلات يعني الناس لو راحت ع القرأن مباشرتا والسنة النبوية ما كان في شي اسمه شيعي سني وما كان فيه شي انا بكرهك لأنك تخالفني الإعتقاد، بالعكس مو من حقي بالأصل

شام: هالشي اسمو اعمال العقل بالنص و هاد نوع من الكفر عند المتشددين. احياناً بالفعل بسأل نفسي طيب الله شو بدو منا نحن بهالمرحلة

سياب: ما عم قلك الإشكالية بقراءة هالناس للنص الديني واحتكارهم الحقيقة وتسويقها على انها شيء مقدس

شام: طيب يعني بحس احيانا لازم نكون فطاحل لنفهم الدين منيح و الانسان العادي مارح بيفهم شي

سياب: لا ابدا، الدين ما بده هالفطحلة يا اخي واضح لانه جاي ع الفطرة . . لك الإنسان البسيط ما عنده مظاهر التعصب لولا الحقن تبع المشايخ

شام: القراءة المنفتحة العقلانية للدين محدودة جداً و على نطاق بس فترة صغيرة بحكم المأمون على ما اعتقد و السادة المعتزلة هنن اول مين مشي بهالخط

سياب: اكابر المعتزلة . . سيدي حديث يطول لكن انا مضطر امشي

شام: مع السلامة …………..عوجاااا. 

~ بواسطة عبد السلام إسماعيل في 2008/05/20.

9 تعليقات to “منطق الأقلية . . وأزمة التخلف الديني”

  1. التطرف الديني مرض يزرع في أرض خصبة مريضة لتنفيذ مآرب سياسية و أقتصادية بأدوات تحت أسم الدين .
    بدأت تلك التسميات بالظهور على مسامعنا من بعد حرب العراق و الاحتلال الأمريكي له و بدأت بزرع الفتنة و من هنا بدأ تلك التسميات و انتشرت حتى أصبح هناك معسكران معسكر شيعي ( أيران ) و معسكر سني ( السعودية ) لن يتم الشفاء من تلك التسميات إلا بخروج الأحتلال و كما ذكر الأخ سياب { سياب: يعني لو ايران عم تدفع هالفلوس مشان فتح مراكز حوار والسعودية نفس الشي كان من زمااان ازمة شيعي سني محلولة او ع القليلة خفت بس المصيبة الطرفين عم يشحنوا ضد بعض على الرغم من ان الازمة ازمة تاريخية انقضت وما يجمع هو الاكبر وهو الباقي والمستمر } هذا الكلام صحيح تماماً و لكن لا حياة لمن تنادي و الله يستر من الأعظم .

  2. ((شام: رح وضحلك لاحظ معي هلئ الشيعة بالجتمع كيف؟ يعني نحن بالشام مثلا الشيعي ما بيشغل غير شيعي و ما بيشتري غير من عند شيعي و اكتر تعاملاته المالية مع شيعة كمان و حتى سكنن، يعني عم بتحس دغري انو في جدار بينك و بينو)).
    عفواً.. يحتاج النص أعلاه إلى مزيد من الدقّة والتعميم بالمطلق لا يجوز في هذه النقطة، إذ أنني عاشرتُ تجمعات مختلفة في الشارع السوري وتوجهات مختلفة وأديان مختلفة والشيء الذي قاله (شام) هو مغاير لما رأيته ولمسته بحكم علاقاتي الواسعة في سورية، وأظن تداول الموضوع من وجهة نظر (سنية) فقط، يفقده مصداقيته. ربما نحتاج إلى تداول الموضوع بعد أن نفض أنفسنا من كل تراكماتنا السابقة..
    بالمناسبة عمو (عبد السلام)ما عندك حل وسط إما موضوع من سطر أو موضوع من الف صفحة🙂
    تحياتي للمتحاورين.. ساستمع بصمت فقط..
    استمرّوا..

  3. يعني الهيئة انو الواحد فيكون بيعرف عن الشيعة أكتر من الشيعة نفسهم، ويمكن ما يكون بيعرف عنهم الا الاسم.
    لذلك ياريت تستحوا على دمكم وبلا اثارة نعرات طائفية، لان الشيعة بقيوا مضطهدين عشرة قرون ومع ذلك ما زالوا مصدر الشرف الوحيد للامة الاسلامية.

  4. الحوار يحتاج للتروي وبعض الموضوعية في قراءته..
    لا أرى داعي لوصفه بإثارة النعرات الطائفية سيما وأن كاتب الحوار أظهر وجهتي نظر يعيش أصحابها في بيئة واحدة ويجمعها روابط عديدة وأهمها الدين الذي يعتبر الإيمان جوهره ولا داعي لأن أنظر للإنسان -الذي أشاركه الهواء الذي يتنفسه والأرض التي يقف عليها والمصير الذي ينتظره- في إطار فقهي طائفي ..لأدع هذا الأمر لعلماء الفقه والشريعة..

    اقتباس: “سياب: التطرف قذر اين ما وجد وانا مسلم فقط .لا شيعي ولا سني وما بدي حدا يصنفني”

    ومن منا يريد ..!

    هذا مرور سريع للنص ..تحية لك

  5. تحياتي عماد . . وبالفعل فإن هذه الظاهرة والمسميات قد تأججت من بعد الإحتلال الأمريكي للعراق والذي عمل على إثارة المشاعر والنعرات الطائفية والقيام بالكثير من الأعمال التخريبية لزيادة الفتنة وتقسيم المنطقة أكثر وأكثر . . والذي كنت استغربه فعلا في تلك الآونة قيام معظم وسائل الإعلام العربية بالسير بركب الحملة الامريكية من خلال تداول وتعميم هذه المسميات حتى أصبنا بالصرع جرائها . . كما سارو من قبل بمصطلح العالم العربي ومن بعده الشرق الأوسط والحرب على الإرهاب ودول الإعتدال والممانعة وغيرها من المصطلحات الأمريكية التي نعتمدها دون الإنتباه لها.

    بالتأكيد خروج الإحتلال سيخفف كثيرا ولو الآن في العراق أدرك الجميع انهم ضحية جميعا لمجرم واحد وانهم بالنهاية ابناء وطن واحد . . ولكن المسؤولية تقع علينا نحن اولا وآخرا وعلى وعينا بأننا جميعا ابناء ارض واحدة.

    الدول التي ذكرتها لا هم لها سوى خلق زعامات ومناطق نفوذ على حساب الشعوب وامنهم ومع هذا نتأمل منهم خيرا:)

    شكرا لك.

  6. اقتباس:
    ((شام: رح وضحلك لاحظ معي هلئ الشيعة بالجتمع كيف؟ يعني نحن بالشام مثلا الشيعي ما بيشغل غير شيعي و ما بيشتري غير من عند شيعي و اكتر تعاملاته المالية مع شيعة كمان و حتى سكنن، يعني عم بتحس دغري انو في جدار بينك و بينو)).
    عفواً.. يحتاج النص أعلاه إلى مزيد من الدقّة والتعميم بالمطلق لا يجوز في هذه النقطة، إذ أنني عاشرتُ تجمعات مختلفة في الشارع السوري وتوجهات مختلفة وأديان مختلفة والشيء الذي قاله (شام) هو مغاير لما رأيته ولمسته بحكم علاقاتي الواسعة في سورية، وأظن تداول الموضوع من وجهة نظر (سنية) فقط، يفقده مصداقيته. ربما نحتاج إلى تداول الموضوع بعد أن نفض أنفسنا من كل تراكماتنا السابقة..))

    تحياتي مداد . . بالنسبة للإقتباس الذي اوردته فعلا مثلما تفضلت هو يحتاج الى تدقيق والتعميم خطأ من حيث المبدأ . . لكن انا رددت على هذا الأمر بشمولية تتجاوز هذه النقطة من خلال النص التالي:((وأي أقلية تحت أي تصنيف بأي مجتمع تلاقي انهم ميالين للتعامل مع بعض أكتر، هالشي حالة عامة مانها حكر على حدا معين.
    ))
    رغم انه هالحالة العامة ليست سارية دائما.

    اما بالنسبة لرأيك اننا تحدثنا من زاوية نظر سنية فأعتقد ان الحديث على الأقل من طرف المحاور سياب لم يتطرق للمسألة من منطلق سني او شيعي بقدر ما هو منطلق يعبر عن وجهة نظر ترفض كلا التسميتين على الرغم من وجودها واقعا وعلى أقل تقدير محاولة لتجاوز هذه الإشكالية والنظر اليها ضمن سياقها التاريخي وعدم اعتبار الخلاف الفقهي او حتى العقائدي عائقا امام قبول الآخر، فضلا عن اني لم أبرئ طرفا وأجرم الآخر بل انتقدت كلا الطرفين واشدت بما أراه يستحق لديهما. . علما اني أعتبر نفسي خارج التصنيفين . . وأقبل فقط بتصنيفي كمسلم بدون اي تخصيص.

    ويبدو فعلا اني كذلك اما سطر او جريدة🙂

  7. مايو 21, 2008 at 10:07 ص واحد شيعي Said: اقتباس
    يعني الهيئة انو الواحد فيكون بيعرف عن الشيعة أكتر من الشيعة نفسهم، ويمكن ما يكون بيعرف عنهم الا الاسم.
    لذلك ياريت تستحوا على دمكم وبلا اثارة نعرات طائفية، لان الشيعة بقيوا مضطهدين عشرة قرون ومع ذلك ما زالوا مصدر الشرف الوحيد للامة الاسلامية

    بدات وعرفت عن نفسك باسم واحد شيعي

    اليس غريبا ان تصنف نفسك وانت بنفس الوقت تطلب عدم اثارة نعرات الطائفية!؟

    يا مسلم وبعيدا عن الطائفية ان اردت تصحيح شيء فالاولى ان تبدأ به بنفسك

    من اعطاك الحق بقول ان مصدر الشرف الوحيد للامة الاسلاميه هم الشيعه؟ يا سيد ان كان هناك مصدر شرف للامة الاسلاميه فهم فقط اولئك اللذين يعترفون بان الله واحد والاسلام واحد ولا للطائفية

    الافضل لك ان تتعلم اسلوب الحوار الاخلاقي قبل ان تدخل وتعطي رايك او التزم الصمت فهو اكثر اخلاقا

    .

  8. اقتباس: ((يعني الهيئة انو الواحد فيكون بيعرف عن الشيعة أكتر من الشيعة نفسهم، ويمكن ما يكون بيعرف عنهم الا الاسم.
    لذلك ياريت تستحوا على دمكم وبلا اثارة نعرات طائفية، لان الشيعة بقيوا مضطهدين عشرة قرون ومع ذلك ما زالوا مصدر الشرف الوحيد للامة الاسلامية.))

    تحياتي أخي المسلم الشيعي . . بصراحة لا أدري حقا هل قرأت الحديث كاملا ام انك اكتفيت بسطرين لتنسج عليهم فكرة جاهزة حول اي حوار من هذا النوع ؟!

    عموما ولا بأس أجو ان تقرأ الحوار من جديد بعيدا تصور مسبق وأدعك مع هذه المقتطفات التي لا أدري كيف استنتجت انها تثير النعرات الطائفية!!:
    ((الشيعة بكل فئاتهم من طول عمرهم موجودين، وسوريين وعرب ما في فرق وما في احتقان. وان كان في شيء نوع من الاختلاف بين الجميع فهو نفس نوع الاختلاف اللي يخلي الحلبي يعز الحلبي اكتر من الشامي او الحمصي يعني تجمعات طبيعية مبنية على تقسيمات مختلفة تظهر وفقا للحالة التي تخليها تظهر.
    ))

    ((لا لإنك عم تشحن نفسك بقصة سنة شيعة، ما بنكر الواقع السيء لكن نحن المفروض نتخلص من هالعقلية ))

    ((المشلكة متعلقة بمنهج التفكير من حيث القراءة وثقافة قبول الآخر والإنغلاق ع الذات من طرف تاني، لا السنة يقرأوا الشيعة ولا الشيعة يقرأوا السنة إلا بحدود البحث عن أشياء تدين الفريق الثاني، رغم ان الأزهر قام بخطوة ممتازة بتدريس المذهب الجعفري وهاي خطوة المفروض تتبعها خطوات مشتركة من الطرفين.

    الفقه الشيعي فيه شغلات رائعة يا رجل خصوصا بقطاع المرأة ))

    ((لك اخي عنجد انا بفكر احيانا انه يا اخي مشان الله شو الفرق بين شيعي سني؟! لك ما في فرق
    هو نفس الفرق بين حنفي حنبلي . . لك فروقات اجتهادية لا اكثر وانا كمسلم يحقلي اختار الإجتهاد المناسب والمقنع يعني سواء من الشافعي او الجعفري او غيرو دون الإضطرار للدخول تحت تسميات وتصنيفات لا تعنيني بشيء تصنيفات بحقيقتها تصنيفات سياسية في حقبة ما.
    ))

    اخي الكريم ان غاية الحوار هذا هو محاولة تجاوز ما فعلته انت او ما يفعله الآخر من تسمية نفسه بدلالة المذهب أيا كان، واما الإضطهاد فهذا شأن آخر انا شخصيا أدينه أينما حصل ومع اي كان وأظنك أيضا وقعت بتعميم حالة نفخر بها جميعا وسحبتها على الجميع-بشكل يكذبه الواقع على الأقل في العراق- ومنطقك الذي تتحدث به هو ما حاولت رفضه من خلال الحوار كما رفضت المنطق المقابل.
    بالنهاية اي خلاف وانقسام على أي مستوى سواء عقائدي او قومي لا تستفيد منه إلا اسرائيل وأربابها . . ولكننا للآن لم نتعلم من التاريخ!

    مع التحية وكامل المحبة.

  9. تحياتي لك ريانة وشكرا على التوضيح كونك لمستِ ما أرمي إليه وتحية للمسلمة التي تدين الطائفية وأرجو فعلا ألا يتحول الموضوع الى سجال يوجه الموضوع الى عكس ما أريد له.

التعليقات مغلقة.

 
%d مدونون معجبون بهذه: