الأزمة اللبنانية وفتيل الحرب المشتعل

ملاحظة: دار هذا الحديث صباح اليوم التالي لبداية الأحداث في لبنان.

 

 

شام: صباح الخير

سياب: صباح النور اهلا محمد

شام: كيفك شو أخبارك

سياب: تمام

شام: مصطبح

سياب: هلا من شوي صحصحت

شام: سقطت بيروت يا عبد و انا لهلئ ما صحصحت

سياب: عادي تنهض من جديد بس الغريب الجيش اللبناني ماشي ورا حزب الله !! تركهم يعملوا اللي بدهم ياه وبعدين حزب الله يقللهم تعو استلمو حبيباتي. و المشكلة حزب الله عامل حواجز وياخد هويات العالم !!! والجيش كمان يتفرج . . مسخرة. المفروض حزب الله ما عمل هيك، عم يسيء لدوره التاريخي وكمان عم يفجر الوضع أكتر ع المستوى الشعبي

شام: طبعاً لأنو أضعف و خايف من السلاح الالهي . . مابعرف بس اللي متأكد منه انه ما بيقدر يضل الوضع هيك في ضباط بالجيش سنة و دروز من اعلى المستويات

سياب: من حق المقاومة رفض القرارات الأخيرة لأنها فعلا بداية البداية لتجريد الحزب من سلاحه واللعين جنبلاط فتنها وقعد يتفرج والحكومة نفت كل ما طلبه بمؤتمره الصحفي !!!!

شام: و الله حمير

سياب: يعني انا بتفهم رفض حزب الله للقرارات بس ردة الفعل تبعهم

شام: انا معك

سياب: اسقطتهم كليا . . مو هيك الرد بنوب الناس والمدنيين والتلفزيون وبيوت النواب والمسؤولين شو الها علاقة !!!! يعني بهالعمل تحت ذريعة الدفاع عن حق مشروع زاد التأزم الطائفي لأعلى الدرجات وأصبح الخلاف على أرض الواقع بين الناس على أرضية طائفية بشعة، رغم انه خلاف سياسي على خيارات استراتيجية.

شام: يعني اتخيل كتلة المستقبل النبيابية معظمها هي قرار بيروت يعني حزب الله اللي عملوا كسر ارادة السنة او المستقبل بعاصمته بس ماصدقت سرعة السقوط

سياب: لا القضية مو كسر ارادة سنة او غيرو لانه الخلاف سياسي لكن التركيبة اللبنانية عاطيته مظهر طائفي رغم انه السنة موجودين بالمعارضة والموالاة وهالأمر يوضح تماما انه القضية ليست طائفية بالرغم من وجود طائفة بالكامل على موقف واحد، لكن ثقافة القطيع والنظر بعين الريبة للآخر تخلي الكل يركب نظارة طائفية على عيونه.

حزب الله قادر ع السيطرة على كل لبنان ببساطة، بس هالشي ما هو الا سقوط له . . ما نفع تحريره للجنوب وحرق لبنان!

بيقلك نقلا عن كواليس اجتماع الحكومة انه جنبلاط قال إما تصدره القرارت او بسحب وزرائي من الحكومة وبالتالي تسقط قام نفذوها !!!

شام: لهلدرجة

سياب: هيك الأقاويل وما في شك ومتل ما هو معروف الكل بده يسحب سلاح حزب الله وهاي خطوة أولى لتحقيق هالأمر وانقياد الحكومة ما هو الا تنفيذ لرغبة لبنانية تلاقت مع الرغبة الأمريكية ومشروعها لتكون اسرائيل الدولة القادرة الوحيدة.

شام: يعني بس بصراحة هلئ الحكومة ماعاد تقملها قائمة نهائياً انكسرت تمام

سياب: اي سلامتك ما عندهم شي

شام: اذا بيروت العاصمة مستباحة بهالشكل و لك كيف باقي المناطق

سياب: شو يقدرو يعملو امام حزب الله وقوته، الأمور عم تتطور لحرب اهلية وحزب الله عرفان وتصريحات نصر الله بصراحة فوقية جدا لما يقول نحن قادرين على رميكم بالبحر لكن ما بدنا! يعني عم يتمنن عليهم . ببساطة هاي رسالة واضحة للجميع انه لازم يتسلحوا ويكون عند كل طائفة وفريق جيشه الخاص مشان ما حدا يقول للتاني انا لو بدي اقضي عليك او أقصيك كان من زمان عملت هالشي.

يعني حزب الله بعمله هذا عم يعمم منطق اللادولة في ظل تهاون الجيش وإخلاله الغير معقول بواجباته وهالشي يؤكد انه المفروض السلاح غلط يكون بإيد غير ايد الدولة.

شام: ما اظن حرب اهلية لانو ببساطة الطرف التاني ماعندو لا سلاح حربي و لا عتاد و لا ميليشيات مدربة. لك يا عبد الله وكيلك الامور مو قصة شبكة اتصالات و عميد مابعرف شغلة اكبر

سياب: طبعا قلتلك ازمة اقليمية ومشروعين متصادمين، وتجريد الحزب من شبكة الإتصالات خطوة أولى لتجريده من سلاحه وبالتالي بداية الغلبة لمشروع على آخر، لهيك المقاومة ردت بعنف أنا ضده من حيث استخدام السلاح.

شام: متل ما حكى جعجع امبارح سقطت مشروعية السلاح نهائياً

سياب: تماما السلاح تم استعماله بالداخل وحزب الله ومعنوياته العالية جاية من قوة سلاحه بالمقام الاول وهالأمر اسقط الشرعية من حيث الإجماع اللبناني.

شام: يا عبد انا حاسس انو الدعم الدولي رح يوقف متفرج

سياب: وانا هيك بقول لكن ممكن يصير دعم بالسلاح ويخلو هاللبنانين متطاحنين بين بعض مشان تجي تسوية ما على ملفات اقليمية بدماء لبنانية.

شام: مافي أرضية لهل الشي الا اذا انفلتو فلسطيني المخيمات

سياب: الفلسطينية ما رح يدخلو هيك بتصور

شام: اخي المنطقة صراع نفوذ بين ايران و امريكا مو اكتر و كل شي قابل للمساومة بيناتن بس لاحظت بدقة تحييد الجبل

سياب: لهيك عم قلك انه رح يتركوهم متصارعين ولابأس من دعم يزيد حدة الصراع والإقتتال مشان تسخين المواقف لإنضاج تسوية ما.

مبارح بجريدة القبس في خبر ناشرته وكالة الأنباء الألمانية نقلا عن مصادر خليجية مفاده أن ايران طلبت وساطة السعودية عند امريكا مقابل قيام ايران بتهدئة الأوضاع في لبنان وتسهيل انتخاب رئيس!

شام: ياعبد هلئ فهمنا الطرف الأول من الصراع امل حزب الله مين دخلك الطرف التاني جريدة المستقبل و لا فارس خشان

سياب: والله يا شريك النتيجة النهائية ما في حدا ربحان وحزب الله للأسف عم يحرق تاريخه بهالعمل اللي ما فيني سميه غير انقلابي، لاحظ انت المطار مسكرينه والميناء مسكرينه وقلب بيروت وقفوه سابقا وشلوا الحركة الإقتصادية والقرار اللي بدهم ياه يمشي واللي ما بدهم ياه ما بيمشي، كل هالأشياء بالنهاية ما عم تأثر على حدا من هالقيادات الأخرى بقدر ما هي مأثرة على لقمة الناس. هاي لبنان من اغتيال الحريري الموسم السياحي عم ينضرب ولبنان عايش ع السياحة.

طالما انك يا حزب الله قبلت الإنخراط باللعبة السياسية لازم تحترم قواعدها بالحد الأدنى على الأقل.

المدنيين شو الهم علاقة وانزال السلاح ع الشارع ليش؟ وشل حركة البلد ليش، كان ممكن القيام بإيقاف القرارات بغير هالطريقة المهينة لتاريخ المقاومة.

شام: صرعونا انو سعد الحريري عنده ميليشيات بالاردن و الموساد عم يدربها و كلشي و طلعو الشباب ماعندن غير كم بارودة للحماية بالمكاتب

سياب: يعني شو سلاحها حراس مع شوية بواريد والغريب اذا لاحظت قناة بري عم تنقل اخبار تزيد توتر الوضع كل شوي خبر عاجل ميليشيا المستقبل وقوع خسائر في صفوفها وسحب سلاحها.

شام : طبعاً طبعاً عم يأججوا الوضع بزيادة ويشحنه الناس طائفيا بس مستقبلا الوضع هيك ماعاد يمشي و بكرا بصير السني ببيع سيارتو مشان يشتري سلاح والمسيحي نفس الشي والدرزي في حال علق معهم حزب الله

سياب: السلاح ما في اسهل من جيبته ولما تعلق السلاح يصير اكتر من الرز، الكل بيأجر بدم غيره واللي صار رح يخلق حساسيات وثارات مستقبلا.

شام : مع اني الله وكيلك مابطيق سعد و المعتوه جنبلاط بس يعني آلمني سقوط السنة امبارح

سياب: مو مسألة سقوط السنة بقدر ما هي المسألة خلافات سياسية والفرق المتخالفة فرق طائفية لهيك عم يصير تماهي ما بين الخلاف السياسي والمسألة الطائفية. لك لبنان مو دولة وبحياته ما كان دولة لهيك المقاومة انوجدت

شام : اكيد بلا ريب . . والله هو فعلا جريمة ان يعبر ذلك الكيان الهزيل -الذي خلق مشوه أصلا- دولة ، فرغم انه مر عليه من السنين مايكفى لصناعة هوية واحدة الا انه اصر على ان يكون كيان عالة على ساكنيه وليس مواطنيه فاللبنانية ليست جنسية بقدر ماهي (مهنة)تؤدي وظائف معينة تطلب منها كما في حالة الكومبارس الالهي .

سياب: لبنان دور وليس دولة (على حد تعبير هيكل) لهيك كل المشاكل الإقليمية يكون الترمومتر تبعها الوضع اللبناني ولبنان كان دائما مطية وساحة لتصفية الخلافات والمشاكل

شام : بس يعني انا اللي مالي فهمانو موقف المسيحين موقف برغماتي بدو يحصل مكتسبات من الصراع السني الشيعي بس هلئ شو؟!

سياب: مين قصدك عون ؟

شام : اي عون و الكتائب

سياب: عون الزلمة همو نفسه بده يصير رئيس

شام : طيب و الحالة العونية بالشارع؟

سياب: والمعطيات ومسار الأمور فرض عليه مسار ما بقى يقدر يتراجع عنه لهيك هو الآن لا يستطيع التراجع عن موقفه لأنه التراجع خسارة كبيرة إله متل ما هو الإستمرار.

يعني اتخاذ مواقف نهائية وقطعية دائما تخلي متخذها تحت رحمتها وتفقده القدرة على التحكم بها وتصبح الظروف والمواقف هي اللي تفرض مسار الحركة عليه. هو وحزب الله اتخذه مواقف نهائية، ليش فكرك حزب الله فرحان باللي عم يصير، هو عرفان انه عم يخسر رصيده لكن ما عاد فيه يتراجع، وانا شخصيا بتمنى كأمنية شخصية انه يستولي على كل لبنان ويقيم دولة جديدة بعيدة عن المحاصصة الطائفية لكن لبنان لا يحكم ابدأ بغلبة فريق على آخر وأصلا لبنان ما فيه يكون دولة.

شام : اي يعني قصدك تورط

سياب: تماما

شام : يعني كنت اليوم عم اقرأ بهالشي انو جروه ليحتل مكاتب المستقبل لغاية في نفس يعقوب

سياب: يا اخي شوف سلاح حزوب الله رائع وقوته رائعة كانت وفعلا رعب اسرائيل لكن هالأمر -استمرار وجود السلاح-خاضع لزاوية الرؤية

شام : رعب شو ؟ انت عم تحكي عن اقوى جيش بالمنطقة… الشي الوحيد اللي قدر يعملو حزب اللهو الاحتماء بقاعدتو الشعبية و بين المدنين بصراحة

سياب:( خليني كفي . . وبخالفك بكلامك اللي حكيته.)

فعندما تنظر من زاوية لبنانية رؤيتك وقرارك رح يكون ضيق وعلى قدر الزاوية اللي تشوف منها الامور واللي هي لبنان، لما تنظر من هون رح تقول بلا شك استمرار وجود السلاح مشكلة ويعيق قيام دولة مطلقة السيادة على أراضيها وشعبها (هذا منطق بديهي) ويخلي كل الفرق الأخرى بخوف وقلق دائم من إغضاب هالفريق المسلح لأنه ما بتعرف ايمت يرفع المسدس بوجهك، وهذا ما حصل الآن.

إذا وجهة نظرهم تتلخص بأنه طالما هالسلاح موجود ما رح يكون في شي اسمه دولة لبنانية، لأنه لأي سلاح بيد أطراف شعبية تحت أي مسمى هو شيء يخالف منطق الدولة بشكل بديهي.

شام : تمام لانو ممكن مستقبلا اي حكومة يصير فيها هيك و تسقط حكماً

سياب: ( طبعا لانه في كيان تاني اقوى منها سلاحا وتنظيما )

الزاوية الأخرى وهي الأشمل والأوسع، الزاوية الإقليمية والقومية ضمن هالمنظار سلاح المقاومة وحزب الله ضرورة استراتيجية كبرى وفعلا هو حجر عثرة كبيرة اما المخطط الأمريكي بالمنطقة – مع موقف سوريا وحماس (رغم ضعف موقفها جراء استلامها السلطة) وأيضا موقف إيران (رغم تحفظاتي الكثيرة على دورها بالعراق ) – متل ما كانت المقاومة بالعراق حجر العثرة بطريق المكنة العسكرية الأمريكية.

لما تاخد الأمور من هالزاوية وهي الزاوية الصحيحة ما فيك للحظة توقف ضد حزب الله او مع الفريق التاني صاحب الرؤية اللبنانية (رغم اني شخصيا انتقد كتير اشيا عند حزب الله)، لكن الإشكالية هون وهي إشكالية كبيرة انه لبنان هو الوحيد اللي عم يدفع الثمن (دماء وخراب )وهو الوحيد اللي جبهته مفتوحة لخدمة قضايا ممكن تجير بالنهاية لتسويات إقليمية . . للأسف مانها رايحة غير ع المواطن البسيط.

بس مع هيك لازم تبقى شوية كرامة بهالأمة وحدا يقول لأ مو معقول الكل ينبطح بدعوى غيري مبطوح وانا بس اللي عم انضرب وفي قول للرئيس عجبني كتير “ثمن الصمود أغلى من ثمن الإستسلام”

شام : انا معك بس بصراحة بدي شك بالنصر الالهي من اصله

سياب: نصر الهي! اخي عمليا اللي صار من حيث النتيجة ما حدا انتصر لا حزب الله ولا اسرائيل لأنه ولا طرف حقق اي هدف من أهداف هالحرب، ما في شك انه حزب الله أدمى إسرائيل وأرعبها وكان ند قوي إلها، لكن لبنان تم تدميره خلال هالحرب وحزب الله مانه جيش لحتى تتمكن إسرائيل من القضاء عليه، وانت تعرف الثقافة العربية الحالية بالإنتصار انها بقاء القيادات وليس تحقيق الأهداف او غلبة الأرباح على الخسائر، لكن مع هيك حزب الله عمل شيء غير مسبوق في تاريخ الصراع العربي الإسرائيلي وهذا شيء يحسب له . . لكنه للأسف -برجع وبقول- شوه هالتاريخ الكبير بأحداث الأمس ووجه بندقيته نحو الداخل لحسم خلافات سياسية.

شام : اخي مبينة متل عين الشمس في تقاطع مصالح بين ايران و اسرائيل و امريكا اكبر دليل هو العراق الموقف المؤلم بحقيقة و بزعل هنن الشيعة العرب اللي نذروا انفسهم وقوداً للمشروع الامبراطوري الفارسي الشيعي

سياب: مو الكل عرب الجنوب الشيعة عم يصيحوا من النفوذ من الإيراني بس المشكلة القيادات كلها بجيبة ايران بس الشعب لا. المال اله دور والتفاف الشيعة حول حزب الله في لبنان لاشك جاي من ايمان بالقضية ونصرة للمقاومة لكن بالمقابل الحزب من خلال المال الإيراني معيشهم وعم يصرفلهم رواتب وانت بتعرف منيح التبعية الإقتصادية تعني التبعية السياسية، وفيه شيعة كتييير بكل الدول العربية الموجودين فيها عرفانين إيران منيح انها دولة الها مصالحها وانتماءاتهم عربية صرفة، لا تقع بداء التصنيف والتعميم.

شام: و حط عالحساب شبكة الاتصالات موفرة فواتير كمان

سياب: شبكة الإتصالات بس للقيادات السياسية والعسكرية بالحزب مو للناس العاديين.

شام : متل سعد الحريري بلا تشبيه

سياب: واحد معتوه هاد يا زلمة دخيل الله انه صار رئيس كتلة نيابية ووجه عام ما يتعلم كيفية القاء خطاب بلغة سليمة !!!!!!!! لك كلمتين على بعض ما بيعرف يحكي.

شام : ههههههههه هو فاضي

سياب: فعلا نتاج سعودي طيب يتعلم يتدرب على هالشي

شام : سليل ابو متعب

سياب: خخخخخخخخخ بالفعل.

 

يتبع . . . 

 

~ بواسطة عبد السلام إسماعيل في 2008/05/13.

رد واحد to “الأزمة اللبنانية وفتيل الحرب المشتعل”

  1. […] منطق الأقلية . . وأزمة التخلف الديني تتمة لحديث سابق (الأزمة اللبنانية وفتيل الحرب المشتعل) […]

التعليقات مغلقة.

 
%d مدونون معجبون بهذه: