أزمة طاحنة . . أم طفرة مرتقبة؟

ملاحظة من حسام: يلي بينخدش حيائه . . يلي بيرتعب، في ألفاظ يا عيب الشوم ممكن تدايئه . . بس هي ضرورية لتكتمل الصورة واذا ما اكتملت الصورة راسلونا لنوضحها الكن . . خدمة ما بعد البيع.

 

hussam:  اي شو اخر الاخبار و القضايا

 

سياب: والله ما في شي بس كنت عم فكر

 

hussam: اي

 

سياب: انه شالو الدعم عن المازوت والبنزين والمواد الغذائية طيب هاي كانت تكلف بلاوي زرقا

 

hussam: اي

 

سياب: هلأ هالفلوس الزيادة اللي كانو يصرفوها ع الدعم شو مصيرها ؟

 

hussam: سؤال وجيه، بس لاء صار عباس بدباس، يعني بطلوا يدعموا لأن صارت الأسعار موحدة. بس مو هيك السؤال، السؤال يلي بيطرح نفسه بنفسه انو هني كانوا يعملوا الدعم عن طريق زيادات و ضرائب تانية.

مثلا كانت مؤسسة الإتصالات تحط للخزينة فلوس وعندك ضرائب الرفاهية و الكهربا وكل الضرائب التانية اللي كان يتحملها المواطن. هالمصريات الزيادة كانت تدعم الدعم، طيب هلاء طار الدعم معناها لازم ترخص اسعار المكالمات الهاتفية و ما يصير ضريبة رفاهية ما بعرف زيادة الاسعار بالتلفوانات بالمواصلات !!

 

سياب: مو بس من الضرائب، الدعم كان يكلف خزينة الدولة ملايين الدولارات يوميا

 

hussam: و لك صح كان يكلفها بس شو هاي جايبة من جيبتها، جايبته من مصدر دعم تاني

 

سياب: بقى اخي نحن المفروض مقبلين على طفرة بالنمو لانه صار في مصاري كتير عند الدردري والحكومة

 

hussam: نحنا مقبلين ع طفرة بالنمو و مبارح رفيقي قلي ضليت بصف الخبز ساعة لاخدت ربطيتن خبز ؟؟

 

سياب: اي بعرف سحس

 

hussam: حكيني عربي

 

سياب: انه سياسة حكومتنا من دهنه سئيلو

 

hussam: اي هادا كان زماااااان من دهنو سئيلو،ايام الدعم هلأ بطل في دعم

 

سياب: بعرف لهيك عم قلك انه المفروض في طفرة بالنمو رح تصير

 

hussam: من وين بدهن يجبوا الدهن ؟؟ من الاستثمارات الخارجية صح

سياب: ولا شو رأيك انت معقول الشباب يتصرفو بالمصريات تبع الدعم ولا ما بيعملوها ؟

 

hussam: احساسي غير هيك اقتصاديا ما بعرف لك انا مو هيك شايف، شايف انو مابئى في مصاري دعم خلصوا نفضوا الشباب لهيك شالوا الدعم

 

سياب: كيف يعني

 

hussam: يعني هلأ مو كان من دهنو سئيلو

 

سياب: اي

 

hussam: الدعم انشال

 

سياب: حلو بس للآن عم يسحبو دهنو بس ما في سئيلو

 

hussam: معناها مابئى في مصاري فائضة تدعم الدعم

 

سياب: لا

 

hussam: لكن شو

 

سياب: مو هاد السبب

 

hussam: في بس بدهم يستخدموها بشي تاني؟

 

سياب: السبب يا معلم انه الحكومة عم تتكلف كتير ع الدعم

 

hussam: طيب بيكفي تقلي عم تتكلف قلي انو مابئى في مصاري تدعم فيه

 

سياب: لك يا اخي روق وهدي

 

hussam: طيب

 

سياب: الحكومة معلم كانت مواردها جاية بتعرف انت من وين

 

hussam: من زيادة الاسعار من الضرائب استثمارات خارجية

 

سياب: النفط والزراعة والسياحة والصناعة (العلكة والشيبس) وجيبة المواطن مع شوية تصدير لمنتجات خفيفة.

 

hussam: طيب

 

سياب: النفط سلامتك نشف، ورغم الطفرة العالمية بأسعار النفط لكننا لم نشعر بأثرها أبدا كما لو كنا نستورد نفط مو ننتج!!

 

الزراعة سلامتك مطر ما عاد فيه على اعتبار انه الحكومة معتمدة على رب العالمين بهالقصة.

 

hussam: اي ولك الزراعة اكلت هوا عنا

 

سياب: شو عم قلك، بقي عندك مصدرين وصار في مصدر جديد. جيبة المواطن وشي تاني مش رح قولو مفتوحين على طول ما بيتسكرو

 

hussam: اكيد ههههههههههههههههه

 

سياب: والصناعة والسياحة شغالين ايد ورجل بس شغالين وهلأ صارت الإستثمارات الخارجية

 

hussam: مافي هالحكي كله هادا شي مقنع الحقيقة مو هيك كله متل خدعة بصرية

 

سياب: بقى الحكومة ما عاد فيها تتحمل تبقى داعمة المواطن ضمن الظروف السابقة من اضمحلال موارد هامة متل النفط والزراعة وكمان موجة الغلاء العالمية.

 

لهيك قررت تشيل الدعم وتحول هالمصاري اللي كانت تدفعها من جيبة المواطن ومصادر أخرى الى استثمارها بأشياء تعود بالنفع العام على الجميع وهيك تكون رفعت ايد من مطرح وحطت ايد بمطرح تاني ممكن يربحها أكتر ويجيب دخل أعلى جاي من الإستثمار، هيك المنطق والاصول بيقول.

 

hussam: انا بعرف انو الاستثمار بيجي بيخلي الشعب يرتاح بترخص الاسعار و بيصير في رفاهية، ما بتغلا

الاسعار و بياكل هوا المواطن

 سياب: لهيك قلتلك لازم يكون في طفرة بالنمو، لأنه الحكومة كانت تدفع مصاري بدون ما تستفاد منها فعليا، الآن هالمصاري لازم تستثمرها بمشاريع مربحة وبالتالي هالمصاري صارت تجيب مصاري بدل ما كانت رايحة هيك.

 

لكن السؤال هل الشباب الطيبة رح يتركو هالمصريات تسير ضمن ما هو مفروض لها من مساهمة في تحسين وضع المواطن والوطن ولا رح يكون الهم رأي آخر ؟

 

hussam: عبد السلام انا ما عندي ثقة انه رح تتحسن الأمور فعلا وما بقدر اني صدق . . الواقع اثبت هالشي من اربعين سنة.

 

سياب: وبصراحة انا مالي هالثقة نظرا لحالة الفساد المستشرية بكل مكان وكلمة طفرة بالنمو اشبه بالنكتة ضمن الوضع الحالي. طبعا المصريات رح ياخدوهم الشباب والمواطن رح يتعود ع الوضع او تعود ومشي حالو، واي زيادة المواطن رح يدفعها وزيادة قبل ما يقبضها بأماكن كثيرة.

 

hussam: ليك لو بتصير ربطة الخبز سعرها 100 ليرة مارح يفتح حلئه بكلمة. ربطة الخبز السياحي 40 ليرة.

هلأ ما كانوا يقولولنا انو البلد عايمة على بحر من النفط . . . الحسكة و القامشلي و دير الزور . . . شو مشان ؟؟

 

سياب: هيك بسمع

 

hussam: وينه

 

سياب: لا أدري

 

hussam: و لك نحنا ما شمينا ريحته يا زلمي طول عمرنا محرومين و عايشين ع نفس العيشة البتهوي مشكلة المازوت من ايامي و انا صغير. المصيبة هلأ انه الاسعار غليانة و الدولار رخصان والريال نازل يعني انا بعرف انو المفروض مو هيك لازم يكون في تعادل و الليرة السورية غليانة

 

سياب: كتير مولعة . . نار

 

hussam: الناس مفكرين انو عملتنا يلي ارتفعت، الحقيقة انه الدولار يلي نازل

 

سياب: بس هاي لعبة تجار ما في عملة بالسوق وكمان الدولار نازل

 

hussam: يا زلمي اشتريت الدولار ب 49 ليرة و لك اخ بعد شي اسبوعين صار ب 46 خسرت تقريبا 20 الف

 

سياب: الدولار الحين 45.85

 

hussam: على اتعس . . و لك المصيبة انو لازم ترخص الاسعار طالما الدولار نازل يحرء اختن شو القصة!!!

 

سياب: لا

 

hussam: اميركا هلكت العالم

 

سياب: في غلاء عالمي شريك

 

hussam: اي السبب الاقتصاد الاميركي اكل هوا *** اختن ***.

شفت يا زلمي العربية قال القرضاوي مفتي انه الصلاة بالشغل لا تتجاوز 10 دقايق

 

سياب: شو

 

hussam: كيف حسبا؟!!!! شفلي كمان الازهر شو عامل http://www.alarabiya.net/articles/2008/04/29/49099.html شو هالوطاوة شو قصة هالناس!!! و احد بيطلع بيفتي انو لازم الزعما العرب يجوا شرعا و يحرم يلي ما بيجي و شيخ الازهر كل فتوة بيطلعها كل يوم غير شكل . . شو القصة يا زلمي!!

 

سياب: “طالبت مبارك برفض التنحي عن الحكم اقتداء بعثمان بن عفان” مسخرة رسمي هيك مشايخ بدهم شحن ع السكراب خربو الوضع فوق ما هو خربان.

 

hussam: انسى صارت عندي قناعة انا بفهم اكتر منهم تخيل !! خربوا حياتنا دخلوا بكلاسينا يا زلمي بدهن يكون الهن بكل تفاصيل حياتك رأي . . بال****كة . . بال****عة . . بطول **** . . بال**** . . بالوضعيات

 

سياب: ههههههههههههههههههههههه

 

hussam: كلو بيفهموا فيه و استشاريين خبرة مو حيالله

 

سياب: هاي المصيبة انه عالم الدين والشيخ عم يفهم بكل شي

 

hussam: اي بستغرب

 

سياب: حتى بالفضاء والفيزيا النووية

 

hussam: شو القصة!! و عندو حلول . . لكل مشكلة حل . . بتستغرب طالما عنا هيك عقول بالسياسة عنده رأي

 

سياب: يعني بعلم النفس ما شالله والإقتصاد والإجتماع والطب وكل شي

 

hussam: بالاقتصاد إله رأي بالاجتماع

 

سياب: وبالسياسة . . صح

 

hussam: بالادب . . طيب ليه عايشين بهالمصايب ؟! ليه مجتعاتنا اكتر المجتمعات اللي فيها مشاكل اجتماعية و جنسية و اخلاقية ونفسية؟؟ بتعرف عم اقرا لصاحبتك وفاء سطان رح ناقشك فيها بعدين

 

سياب: شو

 

hussam: بس زكرت احصائية لغوغل

 

سياب: بس شريك للامانة والموضوعية مجتمعاتنا مو اكتر المجتمعات مشاكل يعني كل مجتمعات الها مشاكلها، بأوربا والغرب يعانو من مشاكل اجتماعية وجنسية ونفسية أكتر من عنا المهم بس عنا عقد كتيييييييييييييير

 

hussam: و لك يا عبد السلام المصيبة انو باوروبا بيحكوا

 

سياب: تمام

 

hussam: بيحلوا مشاكلهن . . نحنا عنا في كبت . . في تعتيم . .في خوف . . المجتمع نايك حلئنا لاء ما بصدق نحنا عنا مشاكل اكتر لأن ما عم نحل القديم و عم تخلق مشاكل جديدة ماصرلي شي قريت قريب عن هالموضوع انه بنحكي عن مشاكل الشواذ بالعالم الغربي صح و الدكاترة النفسيين اتضح معهن انو هادا مرض و لازم يتعاملوا معه

 

سياب: اي

 

hussam: شوف كيف هنيك بيتعاملوا مع كل المحرمات على انها داء، انت مو شاذ انت مريض، رغباتك مكركبة . . طيب نحن شو؟ و لك نحن يلي عنا شواذ و نحن يلي عنا لواط ، بس مين بيحكي . . مين بيسترجي يحكي لا يلي اكله بيحكي ولا يلي عم يطعميه ياه بيحكي . . خوف من المجتمع رهيب فوبيا الفضيحة بتقتل بتعرف مبارح سمعت ع التلفزيون السوري كلمة صح ولأول مرة بتاريخه بيحكي كلمة صح هلأ مع هالتكنولوجيا ثوة الاتصالات صار الجنس على التلفون، و لك هادا مجتمعنا المعقد المريض المكبوت المحروم يلي ما حدا عاطيه اي اهتمام. ما بعرف بس في كانت فكرة تضل تدور براسي هي عبارة انو الشباب عنا بالبلد

 

سياب:؟

 

hussam: مافي اي مؤسسة او اي جميعة او اي هيئة بتعتني فيهن مافي اي مرجعية لهلشباب يسمعوا صوتهن . . يحكوا يعبروا بالمرة مافي مين يسمع صوتهن و هادا اكبر مرض

 

سياب: في منظمة الشبيبة شبها حبيبنا

 

hussam: هههههههه اي منظمة الشبيبة قلتلي . . انسى يا زلمي مشاكل مجتمعنا بنعرفها و حارتنا ديقة و بنعرف بعض الغرب عنده مشاكله البشعة بس بشاعتها ما بتقل عن بشاعة مجتمعنا ع القليلة في عنده شعب بيتفهمه اذا عانى من مرض . . في اطباء بيساعدوه ليتخطى هالمشكلة في دولة عم تدعم بحوث و دراسات مشان تحل مشاكل مجتمعاتها الك خبر انو لاس فيغاس مدينة القمار -كتير بشع القمار- ضرائب القمار فيها بتروح لبناء مدرسة . . جامعة . . مستشفى وعنا بلدنا مقاصف و تعريص و سكس و قمار و دعارة برعاية مسؤولين وما حدا يحكي.

بلاس فيغاس مدينة الكفر و القمار ممنوع تقامر الا بمبلغ محدد . .  بمجتمعنا تبع باب الحارة و الزكرتاوية بيراهن الرجال ع كلسون مرته مشان يضل باللعبة بلاس فيغاس اذا شافوا انو ناس صار عندهن ادمان عل القمار الولاية بتعالجهن ع حسابها شو عم تحكي يا زلمي ولووووو

 

سياب: وين سمعت هالحكي ؟

 

hussam: تلفزيون

 

سياب: اي قناة

 

hussam: يعني بتستبعد هالحكي ؟؟

 

سياب: لا بس انه بيعالجوهم

 

hussam: ال بي بي سي

 

سياب: ايوا

 

hussam: شو ايوا ؟؟ شو اكتشفت؟

 

سياب: ما اكتشفت شي جديد بعرف انهم من زمااان بيعاملو الانسان كانسان

 

hussam: يا زلمي في هلاء برنامج عل الجزيرة الناطقة الرسمي لكل الانظمة القمعية من انظمتنا العربية لنظام ايران لفنزويلا و كوريا الشمالية و كوبا برنامج اسمه من واشنطن، تخيل شو عم يحكي . . تخيل بواشنطن عم يناقشوا نظرية ابن خلدون بسقوط الامبراطوريات و عم يقولوا انه اميركا رح تسقط . . هالإمبراطورية رح تسقط. – بس بالنهاية الكل جايبينهن يحكوا عن سقوطها و كيف لانها موجهة القناة- تخيل . . في واحد عم يحكي كلمة عجبتني

 

سياب: شو

 

hussam: قال انو الدولة بتسقط من الداخل و ليس من الخارج يعني وقت بيكون المجتمع متماسك مستحيل هالبلد يسقط، انا ما بقول انه امريكا ما رح تسقط ابدا بس فيك تقلي المجتمع الاميركي شو ناقصه ؟؟ كلمته صحيحة

نحن مجتمعاتنا منهارة لهيك سقطت العراق ب 15 يوم و بلدك بنص ساعة و البلاد العربية بسيجارة . .  شعوب محطمة منهارة شو ناطر منها عم يحكوا عن اميركا ايمت رح تسقط يا زلمي شي بيضحك اميركا عم تخطط كيف تعيش بالمريخ هلاء . . خير انشالله

 

سياب: هههههههههه لك النهفة مو انه بس يحكو انه رح تسقط هاليومين، عم يقولو كمان انه اقتصادها نكشة وينهار

 

hussam: اي

 

سياب: ويا حرام راحت عليها الدولار بالأرض

 

hussam: هاي اكبر نكتة ضحكتلها انا

 

سياب: يعني ما بعرف كيف هالخلق بتفكر !!!

 

hussam: و لك بتنهار اقتصاديات دول معها

 

سياب: ولك امريكا عندها مشكلة اقتصادية ما في شك

 

hussam: اي

 

سياب: لكن فكرة انهيار اقتصادها الآن أشبه بأمنية أعمى مشان يقرأ لوحة سيارة مسرعة

 

hussam: طيب ليه؟ انا بشوف انه مستحيل بالوقت الحالي ينهار اقتصادها

 

سياب: اخي هاي لعبة كبيرة . . كبيرة كتير . . احد محاورها ضرب اليورو

 

hussam: ممكن

 

سياب: وامتصاص الصدمة النفطية والأسعار المولعة واحتواء التضخم

 

hussam: لانهم عارفين شو عم يعلموا

 

سياب: وزيادة صادراتهم مشان يوقفوا الصين واليابان . . الصين عم تزعج امريكا بمنتجاتها.

 

hussam: يعني عارفين شو عم يعلموا

 

سياب: اخي دولة كونية متل أمريكا –عندهم اخطاء اكيد-  لكن برأيك مو عرفانة شو عم تساوي ؟

 

hussam: لاء انا متلك هيك بحكي انه اميركا بتعرف شو عم تعمل، كلامك صح انا كمان ما بصدق.

 

سياب: ولا مفكر طاقمها متل الطقم اللي عنا الدردري والبربري والمحلل الكبير الشعيبي

 

hussam: مبارح طلع ع التلفزيون السوري مع صاحبك شو اسمه تبع مدارات

 

سياب: صارم

 

hussam: تضرب هيك قناة هي واللي واقفين عليها

 

سياب: ههههههههههههههههههه

 

hussam: كل واحد عندك بهالبلد بيتفصح غير شكل . . عاهات يا زلمي سحبان الله عندي قناعة كل

شخص بيقبل ع حاله او يتربط معهن بيكون معاق و فاشل . .  تلقائيا الفشل بيصيبه

سياب: طبعا لانه في قالب ما بيقدر يطلع عنه

 

hussam: سيدي والله انا بحكي من قهري وزعلي على حالنا . . يا اخي بدنا نصير احسن العالم مو بس بالحكي

 

سياب: بعرف سحس شو بدك تقلي . . فهمانك منيح بس بقلك الازمة الكبيرة مو ازمة حكومة وانما ازمة شعب ، الشعب ونحن منهم مو شاطرين غير بالحكي وبالواقع نحن سبب كل المفاسد والحكومة على شاكلتنا صايرة، لما نتغير نحن أكيد هي رح تتغير كمان.

 

hussam: وانا بقول هيك كلو بينفد على بعضه . . رح روج جبلي ربطتين خبز قبل ما يغلو هههههههه

 

سياب: هههههههه الله معك.  

~ بواسطة عبد السلام إسماعيل في 2008/05/12.

3 تعليقات to “أزمة طاحنة . . أم طفرة مرتقبة؟”

  1. […] أزمة طاحنة . . أم طفرة مرتقبة؟ […]

  2. […] أزمة طاحنة ام طفرة مرتقبة […]

  3. […] أزمة طاحنة أم طفرة مرتقبة […]

التعليقات مغلقة.

 
%d مدونون معجبون بهذه: