بلد الصمون والتصدّي!

– معقول هالخبر!

– شو ؟

– امارة ابو ظبي تتوقع بنهاية عام 2007 ان يكون دخلها الوطني قرابة 110 مليار دولار بزيادة 12% عن العام الماضي.

– شو هالحكي، معقول انت متأكد من الرقم !!

– اي متأكد انظر للخبر بنفسك.

– اها فعلا، معناها دبي قديش رح يكون دخلها الوطني السنة ؟!! وقديش رح يكون الدخل الوطني للأمارات كلها ؟!!!!

– والله ما بعرف بدك تسأل الدردري.

– ههههههههههه، تعرف شغلة من 16 سنة انا قرأت ان الدخل الوطني لسنغافورة اللي هي اصغر من لبنان يتجاوز حاجز الـ 100 مليار دولار بالسنة، بقى تخيل يا رعاك الله.

– المصيبة انو سنغافورة ما عندها عشر معشار الموارد البشرية والطبيعية اللي عنا.

– اخي بس في عندهم اللي ما عنا ياه، الإرادة ووضوح الهدف والإنسان، اخي استثمارهم الأول الإنسان لهيك صار دخلهم.

– طيب يا اخي نحن ايمت نصير ؟؟؟؟؟؟؟؟

– هالمرة بدك تسأل أربعة الدردري والدكتور محمد حبش حاكم ما شالله يفهم بكل شي ومطّلع على كل شي، والزلمة ماشالله صاير نجم بهالفضائيات خصوصا انه يتمتع بأسلوب مميز بنطق الحروف خاصة حرف العين، وهذا يعني انو عينو مفتوحة ع الوضع على طول.

– يا اخي تحسو عم يعص ع الحرف عص متل عصارة الجزر، المهم مين الثالث ؟

– يا سيدي كمان لازم تسأل النجم الصاعد الدكتور ابراهيم الدراجي، مشان يحددلك المسألة كلها على بعضها بكم تعداد شغل دروس القومية الإشتراكية.

– والرابع ؟

– الرابع يا اخي الكريم المحلل السياسي الإستراتيجي الدكتور عماد الشعيبي، بس هاد صعب توصلو لأنو مشغول بالإستراتيجيا والتحليلات التقيلة.

– ايوا، لك صحيح ع السيرة نحن مو كان عنا خطط خمسية ؟ شو صار فيها وكم خطة نفذوا منها ؟

– هههههههه اخي كان عنا خطط خمسية، ووصلوا للعشر خطط يمكن، بس شو كانوا يساوو، حطوا الخطة الخمسية الأولى، بقى بآخر الخمس سنين يطّلّعوا يلاقوا انهم ما نفذوا شي، يقوموا يزيحوا المشاريع اللي كانوا ناوين يساووها بالأولى ويحطوها نفسها بالخطة الخمسية التانية وهيك دواليك . . بالآخر عفنوا المشاريع ع الورق وبطلوا شغلة الخطط الخمسية، هلا بلشوا بالخطط الإرتجالية.

– أها، يا اخي فعلا نحن بلد الصمون والتصدي.

– هع هع شو قصدك بالصمون، لك العالم مو لاقية تاكل خبز لحتى تاكل صمون.

– اخي مو هلكونا بقصة انو نحن بلد الصمود والتصدي. – اي – بقى انا غيرت حرف الدال نون فطلعت صمون ، حاكم نحن نافشين حالنا وع الفاضي، والتصدي من الصدأ، لأنو كل مالنا لورا الصدأ عم ياكل فينا.

– لك اااااااااااااااااااااااااااااااااااااااااااااااااا اااااااااااخ يا بلد، غير الموضوع يا رفيق.

————————————–

هذه الفقرة تمت كتابتها بتاريخ 14/4/2007.

~ بواسطة عبد السلام إسماعيل في 2008/05/11.

3 تعليقات to “بلد الصمون والتصدّي!”

  1. […] وحيرنا السيد الوزير محمد الحسين ومن قبله السيد الدردري، يعني طلعت أسعار النفط انبسطنا وقلنا عظيم رح يجينا دخل […]

  2. […] وحيرنا السيد الوزير محمد الحسين ومن قبله السيد الدردري، يعني طلعت أسعار النفط انبسطنا وقلنا عظيم رح يجينا دخل […]

  3. […] بلد الصمون والتصدي! […]

التعليقات مغلقة.

 
%d مدونون معجبون بهذه: